UNGAKHANDELA NJANI UKUQINTELWA IGEZI
Bhadela isikolodo sakho
Kuqakathekile bona ubhadele isikolodo sakho ngokuzeleko. Lokhu kuzakwenza bona i-akhawunti yakho ingabi neenkolodo ezisalelako. Kanengi amakhastama avama ukubhadela ingcenye yemali efunekako, adlumbane bona ngokwenze njalo, azakukhandela ukuqintwa kwegezi. Nangabe isikolodo esiseleko asikabhadelwa enyangeni ezako, lokhu kuzakubangela wena ubudisi bokubhadela isikolodo sakho esizaba sikhulu.
Sibawa bona utjheje bona ukubhadela ingcenye nanyana ubhadala njalo nje, kungadosela ekuthini igezi yakho iqintwe. Ngemva kobana sele uyelelile bona angeze usakghona ukubhadela ngefanelo isikolodo sakho segezi esisaleleko, thintana nomphakeli wegezi wendaweni yekhenu ngokurhabako bese ubonisana naye ngendlela ozakubhadela ngayo.
Amakonyana azakufakwa enanini lemali efanele ukubhadelwa nanyana leyo esaleleko, lapho ikhastama lingabhadeli khona sahlobo, nanyana libhadela ingcenye, nanyana libhadela ngemva kwesikhathi esibekiweko. Lokhu kuzakudosela ekuphakameni kwemali ebhadelwa likhastama.
Fezakalisa iimvumelwano zakho zesikolodo
Nakwenzeka bona ukhe watlikitla isivumelwano sokubhadela isikolodo esisaleleko nomphakeli wakho, kuzakurhelebha ukusilandela ngefanelo. Nangabe uyabhalelwa ukwenza njalo, igezakho izakuqintwa. Kodwana nakwenzeka bona amajamo wakho angene ebudisini obukhudlwana ngemva kokutlikitla isivumelwano, uzakufanele bona wazise umphakelakho wegezi msinyazana. Ubufakazi bamatjhuguluko wamajamakho amatjha bungafuneka.
Lawula ukusebenzisa kwakho igezi
Nawunemitha ejayelekileko (yaziwa godu njengemitha yesikolodo), uzakufanele bona uhlole amayunithi owasebenzisako kunye nemitha yakho njalo nje. Kesinye nesinye isitatimende segezi, kufanele bona kutlolwe amayunithi wesikhathi esigadungileko kunye nalawo wagadesi. Uzakufanele bona wenze isiqiniseko sokobana amamitha wokuvala wesikhathi esigadungileko ayafana nalawo wokuvula wagadesi. Nangabe awafani, buza kumphakeli wangekhenu, khona uzakuthola ihlathululo. Kazi amamitha afundwa babantu, ngesibangeso-ke, amaphoso ayenzeka.
Kuqakathekile ukwazi bona umphakeli ukubiza malini ngeyunithi yinye (kWh) yegezi oyisebenzisako. Nangabe awubuzi kumphakelakho, ungathintana nabaLawuli beGezi yesiTjhaba ukuthola ilwazi. Ukuzwisisa bona uhlawuliswe malini enyangeni leyo, uzakufanele bona uhlukanise imali etlolwe ngamaranda erhemeni legezi, ulihlukanise ngenani lamayunithi elitlolwe e-akhawuntini yakho. (Amayunithi azakuba yisalela eba khona phakathi kwamayunithi wokuvula nalawo wokuvala). Ipendulo yokuhlukaniswokho kuzakuba yihlawulo yeyunithi ngayinye.
Hlela ukutjhugululela emitheni ebhadalelwa ngaphambili
Nangabe ihlelo lokutjhugulula ukusuka emitheni yesikolodo kuyiwe emitheni ebhadalelwa ngaphambili likhona, cabangisisa bona kungeze kwaba ngcono wenze isibawo sokutjhugulula na. Khumbula bona kunemali yokutjhugulela ozakufanele bona uyibhadele. Imali leyo izakuya ngamandla wegezi owanikelwako. Ukutjhugulela kilelihlelo kuzakurhelebha ngalindlela:
Angeze watshwenyeka ngokuthi i-akhawunti yakho izakusalela eenkolodweni
Ungakwazi ukulawula igezi oyisebenzisako
Nangabe igezakho isalele ngeenkolodo, uzakufanele bona ubhadele mantanzi ngaphambi kobana ungatjhugululela ehlelweni lokubhadelela ngaphambili. Imiphumela emihle ebalwe ngaphezulu, ingcono khulu kunomraro lo wokubhadela isikolodo esisaseleko. Buza kumphakelakho umthethokambiso olawulo lokhu. Kanengi, abanye abaphakeli bafuna bona onikelwa igezi enze isivumelwano sokubhadela aqede isikolodo sakhe esisaseleko kwaphela, esikhathini okuzakuvunyelwana ngaso.
Zijayeze ukusebenza igezi ngokonga
Ukusebenzisa igezi ngokonga kuzakurhelebha ukuphungula igezi oyisebenzisako kunye nemali ozayibhadela ngenyanga. Uzakwenza njani lokho Iintofu, amagizara namahitara ngikho okudla igezi enengi.
Nangabe unegizara, yenza isiqiniseko sokobana ithemostata yakho ayikho phezulu khulu. Ungayehlisa uyibeke kuma- +/- 60. Uzakufanele bona uthole irhelebho kusogezakho manqophana nalokhu.
Ukuphuthela igizara: Nangabe ungakghona, ukuphuthelwa kwegizara kunye namaphayiphu kuzakuphungula khulu igezi oyisebenzisako. Lokhu kungatjho bona uzakusebenzisa imali ekukufezakaliseni.
Isitofu: Yenza isiqiniseko sokobana amapladakho akakavulelwa phezulu ngasikhathi sinye. Kukuhlakanipha ukuvulela amapladakho abe phasi ngomlilo ngemva kobana ipoto sele ibilile. Ungathomi usebenzise iplada njengehitara ngombana lizakudlela igezi enengi khulu.
Amahitara: Amahitara wegezi avamise ukusebenzisa igezi enengi khulu. Nangabe awunahitara yerhasi, kungaba ngcono usebenzise ibha yinye yomlilo webha hitara yakho. Kuyazwisiseka nokho bona lokho kuzakuthatha isikhathi eside nawufuna ukufuthumeza indawo ekudlwana.
Ukuphuthela iinsetjenziswa zekhaya: Ukuphuthelwa kwesilinghi yendlu kuzakuphungula umtjhiso olahlekako ngendlini.
Ungathintana nomphakelakho nawufuna ilwazi elinabileko.
INGABE UTHINI UMTHETHO NGOKUQINTELWA IGEZI
UmThetho weGezi ka 1987 ngokutjhugululwa kwawo, uthi umphakeli wegezi angaqinta igezi yekhastama nangabe ikhastama alikabhadeli isikolodo salo nanyana alikakhambisani neenjamiso zokuphakelwa igezi. Umthetho ubuye ulindele umphakeli bona anikele ikhastama amalanga ali- 14 wesaziso ngaphambi kokuqintwa kwegezi yekhastama.
Isikhathesi sithoma ngelanga elitlolwe encwadini. Isaziso esinikelwe e-akhawuntini yenyanga naso siyemukelwa njengesilungile kilokhu. Amakhastama ayabawiwa ngesibangeso-ke, bona afunde koke okutlolwe ema-akhawuntini wawo.
Ingcenye elawula lokhu emazingeni wemisebenzi yamakhastama (NRS 047), yakhelwe engcenyeni yomThetho weGezi obalwe ngaphezulu.
Iinghonghoyilo
Khumbula bona umuntu wokuthoma ofanele umthinte, mphakelakho wegezi.
Ikhastama linelungelo lokufaka isinghonghoyilo ngezinga lemisebenzi yegezi elenzelwa yona mphakeli wendawo.
Umphakeli wendawo uyakateleleka bona alalele bese uqalana nomraro okulilwa ngawo.
Imininingwana yokuthintana nabaLawuli beGezi yesiTjhaba
